- Caritasek arreta ematen dien bazterketa-arriskuan dauden pertsonen arazo nagusia etxebizitza eskuratzeko zailtasuna da.
- Honez gain azpimarratzen du zaurgarritasun eta pobrezia egoeran dauden pertsona askok ongizate emozional eta buru-osasunaren aldetik behar handiak dituztela.
Caritas Euskadi osatzen duten hiru Caritas erakundeei dagozkien urteko jarduera-txostenak aldi berean aurkeztu aurretik, erakundeak balorazio bateratua egin du, bai azpimarratutako datu globalei buruz, bai ateratako ondorioei buruz, Euskal Autonomia Erkidegoan atzemandako pobrezia-errealitateen egoerak ikusarazteko.
Caritas Euskadik 2023an artatutako pertsonen kopurua ez da asko aldatu aurreko urtearekin alderatuta. Hala, Caritasek lurralde osoan 42.241 pertsona artatu ditu (2022an, 34.288), eta horietatik %55,3 emakumeak izan dira (2022an, %56). Antzeko zerbait gertatzen da laguntza ekonomikoen gastuarekin: 2023an 6.876.831,95€-koa izan zen (2022an, 6.900.000€).
Etxebizitza eskuratzeko eta erroldatzeko zailtasuna
Caritas Euskadiko ekintzari buruzko datuek pertsonek eta familiek dituzten zailtasun nagusienak identifikatzeko aukera ematen dute, baita horien inguruko ondorioak ateratzeko ere. Lehenik eta behin, etxebizitza eskuratzeko zailtasuna dago. Familiak etxebizitza edo gelak partekatzera eta bazterketa-egoera konplexuei aurre egitera behartuta daude, etxebizitzen eta gelen alokairuaren prezioak altuak direlako, horiek eskuratzeko baldintzak gogorrak direlako eta horrelako premia larri baten aurrean erantzun publikoa eskasa delako. Horri guztiari etxebizitza-prestazioei buruzko ziurgabetasuna gehitu behar zaio, Diru-sarrerak Bermatzeko Errentaren sistematik kanpo uzten dituen lege-aldaketaren ondorioz. Eta horrekin lotuta, halaber, erroldatzeko zailtasuna dago. Caritas Euskadik arazo hori nabarmendu nahi du, erroldatuta egotea baita eskubideak eta aukerak eskuratzeko giltza.
Bestalde, bizimoduaren garestitzeak eragin handia izan du familien ekonomian eta, neurri handiagoan, diru-sarrera gutxi edo eskasak dituztenen ekonomian. Oinarrizko beharrei aurre egitea eskuratzea nekezagoa denez, Caritasek artatutako pertsona askoren bizi-baldintzak gogortu egin dira eta gizarteratzeko prozesuak ere zailagoak bihurtu dira.
Bazterketa eta buru-osasuna
Caritas Euskadik aztertutako datuetatik atera dugun beste ondorio bat da artatutako pertsona askok ongizate emozionala falta dutela, eta osasun mentaleko arazoak dituztela egoera horiek eragindako sufrimenduaren ondorioz. Horrekin batera, Caritasek egiaztatu du ondoezari aurre egiteko tratamenduak eskuratzeko eta baliabideetara iristeko zailtasunak dituztela.
Boluntariotza
Caritas Euskadik 3.500 boluntarioren laguntza izan zuen 2023an, eta gehienak –%73,2– oraindik ere emakumeak dira. Kopuru garrantzitsu honen atzean Caritasek zerbitzu, baliabide eta programetan arreta ematen dien pertsonei laguntzeko eta ekintzak dinamizatzeko konpromisoa hartu duten pertsona guztiak daude. «Aurten ere, eskerrak eman nahi dizkiegu Caritaseko boluntario guztiei–gehienak emakumeak–, eta haien lanaren balioa nabarmendu, Caritasek justizia sozialarekin duen konpromisoa aurrera eramatea ahalbidetzen baitute».
