- Caritasek 2 ordu, mila arrazoi kanpaina abiatu du, Ikasketetarako Laguntza jardueran aritzen den boluntariotza-taldea indartzeko.
- Boluntarioei astean bi orduko konpromisoa eskatzen zaie, eta gaitasuna izatea eskola-laguntza eta -errefortzua eskaintzeko euskaraz edo/eta gaztelaniaz.
Gasteiz, 2025eko irailaren 19a.- Aurten ere, ikasturtearen hasierarekin batera, Ikasketetarako Laguntza jardueran egiten den boluntariotza indartzeko deia egin du Caritasek. “2 ordu, mila arrazoi” leloarekin, kanpainak haurrei eta nerabeei laguntzeko konpromisoarekin bat egitera gonbidatzen gaitu, astean ordubeteko bi saiotan. Interesatuek informazioa eskatu dezakete 688 64 65 13 telefonoan edo prinfancia@caritasvitoria.org helbidera idatzi.
https://youtube.com/shorts/gwQ3ZVJJFQw?feature=share
Ikasketetan Lagundu jarduera
Jarduera hau abian jarri zuen unetik bertatik, Caritasek beti kontuan izan du ikastetxeei eta erakundeei dagokiela ikasketetan desfasaturik dauden ikasleek dituzten zailtasunei erantzutea. Baina dauden laguntzak ez dira nahikoa lurraldean dauden arazoei erantzuteko. Horregatik, Caritasek, bere boluntarioen bidez, esku hartzea erabaki zuen, eta, hala, nahikoa baliabide ekonomikorik eta familia-baliabiderik ez duten familien haurrei laguntzen die; beraz, horixe da ezinbesteko baldintza boluntarioen laguntza jasotzeko.
Ikasketetan Lagundu jardueran, ikasketetan atzeraturik dabiltzan baina profesional baten esku-hartze espezifikorik behar ez duten haurrekin lan egiten da. Helburua da erantzun bat ematea haur horiek dituzten zailtasunei, dela arlo teknikoan, dela ohituren arloan, eta motibazio eta eskola-laguntzako prozesu bat garatzea, haien errendimendua hobetzeko, eta motibazio falta, absentismoa eta eskola-porrota eragozteko. Aldi berean, prestakuntza-saioak eta laguntza pertsonalekoak egiten dira haur horien familiekin, eremu soziofamiliarra eta horren babes-sarea indartzeko helburuarekin.
Lan-dinamika planteatuta dago ikasketetan eta eskola-bidean laguntzeko saio pertsonalizatuetan, ordubeteko bi saio eskainiz astean; gehienez ere hiru ikasle elkartzen dira ikasgela bakoitzeko, ahal dela ikastetxe eta ikastalde berekoak. Boluntario bakoitzari hastapen- eta sendotze-ikastaroak ematzen zaizkio, bai eta lanerako orientazioa eta materiala.
Boluntarioen profila: Caritaseko eskola-laguntzako boluntarioek gutxienez 2. graduko Lanbide Heziketako prestakuntza dute. Eta enpatia, erantzukizuna eta jarduerarako zehaztutako egutegia betetzeko konpromisoa eskatzen zaizkio.
Laguntza-saio bakoitzean, boluntarioak lan-giro egokia sortzen saiatzen da, haurra gustura eta konfiantzaz senti dadin; eta haren jarrera eta errendimendua hobeak izan daitezen. Prozesuaren barruan sartzen dira ikaskuntzaren jarraipena eta ebaluazioa —bai ikastetxean, bai Caritasen laguntza-saioetan ikasitakoarena—, eta emaitzak familiei helarazten zaizkie aldian-aldian, jakinaren gainean egon daitezen.
2024an, Ikasketetarako Laguntza jarduerak erantzuna eman zien 232 haur eta neraberen beharrei, guztira. 111 boluntariok eskaini zituzten beren denbora eta ezagutzak jarduera horretan laguntzeko. Gaur egun, Haurren Programak Arabako 37 ikastetxerekin koordinatuta lan egiten du.
