- 2024ko datuak bat datoz Euskadiko beste erakunde batzuen datuekin, eta adierazten digute pertsonen ongizatearen oinarrizko elementu batzuetan bilakaera positiboa izan dela; esate baterako, enplegua igo egin da eta oinarrizko errentaren hartzaileak murriztu egin dira.
- Baina ezin dugu alde batera utzi gizartegintzako gure bulegoetara iristen diren eskaera garrantzitsuenak etxebizitzarekin, elikadurarekin eta arroparekin lotuta daudela, eta horrek adierazten digu bizi-baldintza txarrenak dituztenek oinarrizko premietan ere badutela prekarietatea.
- Emakumeak, etorkinak, etxerik gabeko pertsonak dira oraindik ere bazterketaren aurpegiak eta profilak, baina ikusten hasi gara biztanleria zaurgarriaren artean beste pobrezia-aurpegi bat sortzen ari dela, gazteena.
Ezin dugu ahaztu, era berean, Gazteen Euskal Behatokiaren datuen arabera 35 urtetik beherako emakumezkoek batez beste 1.299 € inguru kobratzen dituztela hilean, eta 1.498 € gizonezkoek. Bestela esanda, soldaten batez bestekoa denaren erdia kobratzen dute, pisu baten batez besteko alokairua 1.260 eurokoa den ingurune batean, eta gela batena 500 euro ingurukoa.
Gasteizko Elizbarrutiko Caritasek guztira 4.525 familia artatu zituen 2024. urtean, Gasteizko Elizbarrutiko lurraldean. FOESSA Fundazioaren kalkuluak aplikatuta, esan daiteke gutxi gorabehera 12.680 pertsonari iritsi zitzaiela Caritasen laguntza. Caritasen bulegoetan 27.696 elkarrizketa egin ziren, eta horietatik 21.998ri eman zitzaien erantzuna.
Caritasek detektatutakoaren arabera, pobreziak oraindik ere emakumeei eragiten die gehienbat (% 65,3), eta langabeen kopuruak (% 37), berriz, behera egin du; horrek adierazten du Caritasera hurbiltzen direnek, askotan, badutela enplegua. Jatorriari dagokionez, % 23,6 espainiar familiak dira.
Caritasen erantzuna
Harrera-bulegoetan 577 laguntza ekonomiko eskaini ziren, eta, horretarako, 123.000,20 € eman ditu Caritasek funts galdurako.
Bestalde, Gasteizko Elizbarrutiko Caritasek prestakuntzaren eta enpleguaren alorrean ahaleginak areagotzen jarraitzen du, sustapen pertsonal eta sozialerako eta etorkizuneko aukeretara bideratzeko. Hala, 224 pertsonak hartu dute parte alfabetatze-ikastaroetan, beste 16 pertsonak nazionalitatea lortzeko ikastaroetan, eta enplegurako prestakuntzako sarrera-ikastaroetan 220 pertsona aritu dira. Horiez gain, beste 72 pertsonak oinarrizko konpetentziak eta profesionaltasun-ziurtagiriak eskuratu dituzte. Gainera, 439 pertsonak jo dute prestakuntzarako orientazioa jasotzeko eta curriculumaren diseinua egiteko zerbitzura, eta 50 pertsona daude Hazia 23 programan, enplegurako gizarteratzeko.
Alor ekonomikoan, ahalegin horrek guztiak 295.453,65 euroko gastua ekarri du guztira prestakuntza-beketarako.
Enplegu-programako tailerretan 218 pertsonak egin dute prozesu okupazionala eta laneratu aurrekoa, eta horiei gehitu behar zaizkie enplegu-eskatzaile gisa Lanbila enplegu-agentziara joan diren 702 pertsonak (% 62,8 emakumeak). Enplegu-agentzia horrek 294 enplegu-eskaintza kudeatu ditu; horietatik 173 bete dira, eta azken horietatik 15ek lortu dute luzaroan desiratutako errotzea. Caritasi lotutako laneratze-enpresei dagokienez, esan behar da Berjantzi deiturikoan, ehungintzaren sektorean, 13 kontratu egin direla, eta horietatik 8 laneratzearen esparrukoak izan dira; Lanagro-n, 13 kontratu egin dira Arabako Errioxan, eta horietatik 9 laneratzearen esparrukoak. Giltza Fundazioan 39 langile ditugu laneratzearen esparruan, 30 emakumezko eta 9 gizonezko, eta horietatik 19 Caritasen enplegu-programatik bideratu dira.
2024an enplegu-programan inbertitutako diru-kopurua 986.399,85 eurokoa izan da; horietan sartuta daude prestakuntza-bekak.
Beste programa batzuei dagokienez, esan behar da Elkarrizketa egituratuko eta tertuliako programan 279 pertsonak parte hartu dutela; Emakumeen programan, 338k; Haurren eta ikasketetarako laguntzaren programan, 232 haurrek; eta adinekoen programan, 290 pertsonak hartu dute parte programetan, eta beste 700 lagun artatu dira, batez ere landa-eremuan. Azkenik, Caritasek 28 pertsonaz osatutako 10 familia hartu ditu bere bizitegi-laguntzako programan dituen 7 etxebizitzetan.
Bestelako datu garrantzitsu batzuk
- urtean, Gasteizko Elizbarrutiko Caritasen gastua 3.239.306,41 €-koa izan zen. Gizartegintzara bideratutako kopurua 664.955 €-koa izan zen, laneratze-arloan 986.399,85 € inbertitu ziren, eta komunitate abegikorren programan eta boluntarioen laguntzan, 166.576,19 €.
Diru-sarrerak 3.417.170,90 €-koak izan ziren. Bazkideen kuotetatik 397.629,13 € jaso ziren; diru-bilketetatik, 378.979,86 €; dohaintzetatik, 526.383,34 €, eta, horrez gainera, larrialdietarako 433.419,97 € jaso ziren. Nabarmentzekoa da Lur Santurako 54.400,31 € jaso izana, eta joan den udazkeneko DANArako 351.690,67 €. Erakunde publiko eta pribatuetatik jasotako dirulaguntzei dagokienez, 513.693,17 € izan dira.
Lan hori guztia Arabako Caritaseko 665 boluntarioen eta 1.260 bazkideen etengabeko laguntzari esker izan da posible; izan ere, horiek guztiek laguntzako, sentsibilizazioko eta animazio komunitarioko lanak egiten dituzte, Caritasek parrokiako eta zonaldeetako 40 Caritasez osatutako bere sareari esker Araba osoan eskaintzen dituen programa eta zerbitzuen esparruan.
2025/26 ekitaldirako jarduera-ildoak
Datorren ekitaldian, Elizbarrutiko Caritasek jarraipena emango die bere programei eta jarduerei elizbarrutiko lurralde osoan, pertsona zaurgarrienei harrera egiten eta laguntza ematen jarraitzeko.
Arreta berezia jarriko diegu pobrezia-egoera berriek planteatzen dizkiguten erronkei: gizartegintzako bulegoetatik oinarrizko premiei erantzutea, hala nola elikadurari, arropari eta etxebizitzari dagozkien premiei; laguntza espezifikoa ematea emakumeen profilari (gehiengoa dira); gazteen profilari laguntzea, gorantz baitoa; haurrentzako eta adinekoentzako programen jarduerekin jarraitzea; eta Prestakuntza eta Enplegu programak indartzea.
Gasteizko Caritasek azken urteotan Batzarrean onartuz joan den Gizarte Ekintzako Eredua bultzatuko du. Eredu horren ideia nagusia, laburbilduta, ONGIA ONGI EGITEA da. Horretarako, boluntarioei eta teknikariei zuzendutako prestakuntza-prozesuak bultzatuko ditugu, eta horietan, jarduera hobetzeko gaiak nahiz identitateari buruzkoak (Ikuspegia, Misioa, Balioak) landuko ditugu.
Adi egongo gara FOESSA IX. Txostenak ekarriko dituen berrikuntzen berri jasotzeko, datorren udazkenean aurkeztuko baita.
Ekitaldi hau erronka bat ere bada antolakunderako. Idazkari nagusi berria izango dugu, Jesús Gutiérrez jauna, hain zuzen; izan ere, irailaren 1ean Ramón Ibeas ordezkatuko du, 20 urtez idazkari nagusi jardun ondoren agur esango baitio karguari.
2024 memoria (argitalpena)
